Sunday, July 11, 2010

Qismat ya Muqadar

Main ghaliban darja-e-haftum ka talib-e-ilm tha jab main ne nisaab se muta'liq aik kitaab main ye satr parhi
"Insaan apni qismat khud banata hai"
Us waqt to mehaz yaad karne ki had tak ye satr nazar se guzri lakin kai saloon bad jab kuch din pehle is satr ka khayal aya to zehan is main ulajh kar reh gaya.Maktaba-e-fikr k hamil afraad ki trah aik hi nuqtay per markooz ho kar sochne ko apnate howe jab is satr pe ghor karna shoroo kiya to pehle pehl to is satr ki sdaqat ka gumaan guzra k likhne walay ne bohat sach baat likhi hai.
Lakin jaise jaise dimagh k dareeche khulte gaye is satr ki sadaqat ka gumaan dhuwan ban kar zehan se ghaib hone laga.Kai sawal janam lene lagay.
Qismat kia hai?Insaani zindagi main qismat ka kitna amal dakhal hai?Muqadar kia hai?Qismat aur muqadar main kia farq hai?
Ahista ahista samjh main aana shoroo howa k likhne walay ne is satr main mubalgha amaizi se kaam lia hai.Insaan apni qismat khud kaise bana sakta hai?Qismat ka to maakhiz hi Taqseem hai yani qismat se muraad wo cheezain hain jo insaan k dunia main aane se pehle hi likh di gai hain.
Is satr ki sadaqat ka yaqeen us waqt kiya ja sakta hai jab is main lafz Qismat ki jaga Muqadar ka istemaal kiya gaya hota.Is baat se kai hazraat ko ikhtilaaf ho sakta hai to wazahat karta chalon k muqadar ka makhiz Qadr hai.Zindagi main kuch cheezain aisi hain jin ki qadr karne se insaan apne halaat badal sakta hai.Is mamlay main WAQT sab se aham cheez hai jo insaan ka muqadar bnane ya bigarne main bohat aham kirdaar ada karta hai.
Aik misaal ka sahara le kar agar is baat ki gehrai tak pohanchne ki koshish ki jaye to kuch bura na ho ga.Roz marah k halaat ka hi jaiza lain to pta chalta hai ka agar koi insaan kisi cheez ko hasil karne k liye sar tor koshish karta hai to nataaij k samne aane se pehle apni mehnat ka yaqeen dilane k liye wo ye kehta hai k
"main to maqdoor bhar koshish kar chuka ab nataaij meri qismat per munhasir hain"
Qismat aur Muqadar ka farq is misaal se baasaani samjh aa sakta hai.
Aik sawaal mere zehn main hamesha gardish karta raha k jab koi insaan kisi ko qatl kar deta hai to us ko phansi ki saza kion di jati hai halanke maqtool ki to qismat main tha qatil k hathon qatl hona.Jawab ki talaash main bohat waqt laga akhir piyasay ko kunwan mila aur aik siyanay banday ne btaya k qatil ki qismat main b takhta e daar per latakna tha.Jawaab milne per main apna sar peet kar reh gaya k itni aasan si baat meri samjh main kion nahi i.
Qisa mukhtasir k jahan tak faisly karne aur halaat badalne ki iste'daad app k hath main ho wo app ka muqadar hai aur jahan ye iste'daad khatam ho gai wahan se app ki qismat ka amal dakhal shoroo ho gaya.

22 comments:

  1. khudhi ko kr buland itna k hr taqdeer se pehly....

    khuda bandy se khud poochy bta teri raza kiya ha....

    nice try 2 differentiate b/w taqdeer nd qismat!

    well i think so Allah writes our taqdeer according 2 our aamaalz.
    nd qismat k likha koi mita nahi skta.
    1 thing more has listend by me k, qismat ko dua k zarye bdla ja skta ha.. but i believe k taqdeer ko sirf hard work se badla ja sakta ha.

    ReplyDelete
  2. thek kehtey hein ap,,mgr mera khyyal k qismt ar muqdar aik he hein,,dono pe he zor ni,wo to sun rkhe ho ge na aik teri chah hai aik meri(ALLAH)to ho ga wohe jo meri chah hai...mylb sb phly se tey shuda hai.hm sirf mohray hein..

    ReplyDelete
  3. @shineUCET
    "1 thing more has listend by me k, qismat ko dua k zarye bdla ja skta ha.. but i believe k taqdeer ko sirf hard work se badla ja sakta ha."

    i agree with u here.

    ReplyDelete
  4. @anonymous
    mere khayal main qismat aur muqadar dono mukhtalif cheezain hain.muqadar badla ja sakta hai lakin qismat ka badalna boht mushkil hota hai.

    ReplyDelete
  5. mujhe in dono ka farq samaj mein nahi aata. n mein is mushkil mein parhna bi ni chahta......itna mujhe pta he k jo mera he wo mujhe mil k rahe ga or jo nahi he wo kabi ni mile ga....par koshish to karni he.....q k pta ni he k kya mera he or kya ni.....or agar ye pta chal jaye to duniya mein koi mehnat na kare.....

    ab kya qismat, kya muqadar, kon jane ye kya he!!!!

    ReplyDelete
  6. Nice Urdu...bahut arsay baad itni achhi urdu parhi...

    Good topic too...

    UCET mein bhi bahut Muqadar ke Sikandar hain...

    ReplyDelete
  7. @happy worry
    app in dono ka farq samjhne ki mushkil main kion nahi parna chahte?

    ReplyDelete
  8. @ Sir Abbasi
    thnx Sir.


    Sir main janna chahon ga UCET k muqadar k siknadaron k baray main.

    ReplyDelete
  9. nice post usman....

    @ Anonymous

    hum sirf mohray e hain to hmaray banany ka maqsad foat ho jata hai....mai apki iss bat se ikhtalaf krun ga lakin ye b thek hai k sb kuch preplan hai lakin Neeki or Burai k raste pe chalne ka ikhtyar phir b Allah ne insan ko dia hai......kiu k uss k pas aqal hai so wo apni aqal se ye faisla kr skta hai k kia darust hai or kia nahi........or issi ki base pe saza o jaza ka process ho ga....

    ReplyDelete
  10. to smile spreader...to phir ic sheir ko kya kahein gy..
    na haq hm mjburo pe tohmet hai khudmukhtari ke,,chahay hai so ap kry hai hm ko abbus bdnaam kiya...kuch nahi hamry ikhtiyar mei..

    ReplyDelete
  11. ar *tm chah b nahi skty jo WO na chahy to* ic pe b ghour krein phir kahye k kya muqdar kya qismat..

    ReplyDelete
  12. another great knock by mani..
    well usman mae is post ko one of the best post ever on this blog consider karta hn..
    keep going jigz,,
    ok.and .i agree with u..on this KISMAT and muqadar point..

    ReplyDelete
  13. @hash
    app ki traf se daad wasool karne ka apna hi maza hai:)

    ReplyDelete
  14. @Anonymous
    App ne smile spreader k liye jo shair likha hai us ka jawab main aik shair se deta hn

    "hain kawakib kuch nazar aate hain kuch
    dete hain dhoka ye bazigar khula"

    app ne jo shair likha hai us main bhi kuch yahi kefiyat hai.
    shayri sirf haqeeqat per hi mabni nahi hoti ye to aik peraya hai apne khayalat ko paish karne ka.agar is ko sach maan liya jaye phr to log kai mushkilon main par jayain.ye shair dekhain zara

    "jab k tujh bin nahi koi mojod......phr ye hungama ae khuda kion hai"

    is shair ko sach to nahi maan sakte na.
    baat nikli to bohat door talak jaye gi dost.

    ReplyDelete
  15. ar tm chah b ni skty jo WO na chahy to ic pe kya kahein gy?

    ReplyDelete
  16. man makes his fate himself

    ReplyDelete
  17. @anonymous
    qismat main hi na ho koi cheez to app kaise hasil kar lo gay use?

    fate se murad muqadar ho sakta hai qismat nahi.

    ReplyDelete
  18. hm wo step he ni ly skty jo likha ni hamry muqder mei,,sb phly se tey hai maan jayein.

    ReplyDelete
  19. @anonymous
    sb nai 50% tey hai aur 50% hamre hath main hai.app maan jao ab.

    ReplyDelete
  20. Qismat do tarhan ki hote hai. Even that both types have names, but I dont remember them now. But by definitions, aik qismat woh hai jo likh di gai, aur aik qismat woh jo blank di gai aur hum usay khud likh rahe hain jab se hosh sanbhala.

    ReplyDelete
  21. @Sir Qaiser
    dosri qism muqadar hi hai sir.muqadfar ko koi aur naam de dain app lakin baat to wohi hai na k insaan k faislon ki sakat us k mustaqbil pe asar dalti hai.

    ReplyDelete